Drejtoria e Krimeve Ekonomike e Policisë së Kosovës ka arrestuar sot në Prishtinë, 63-vjeçarin me inicialet R.M., zyrtar i gjendjes civile në Komunën e Prishtinës, më saktësisht ofiqar i Zyrës Lokale në Dardani.
Siç njofton Policia 63-vjeçari dyshohet për veprat penale ‘keqpërdorimi i pozitës apo autoritetit zyrtar’ dhe ‘falsifikim i dokumentit’.
“Veprat penale dyshohet se janë konsumuar kur i dyshuari ka regjistruar persona pa bërë verifikimin se a plotësohen kriteret për regjistrim duke bërë që disa nga të regjistruarit të krijojnë identitet të dyfishtë (identitet të Kosovës dhe një shteti fqinj)”, njofton Policia.
Tutje bëhet e ditur se në cilësi të provave materiale janë sekuestruar përkohësisht: një telefon celular; 60 fishekë të kalibrit 7.62 mm; një karikator i armës; dokumente të ndryshme, certifikata, vërtetime të regjistrimit, foto të librave amzë dhe dokumente të tjera të personave të ndryshëm.
Të dyshuarit me vendim prokurorit i caktohet masa e ndalimit prej 48 orëve dhe dërgohet në qendrën e mbajtjes.