Shkak i arrestimit të kryeshefit të KEK’ut, kryeministri Albin Kurti ka shpërthyer me një mori kritikash ndaj kryeprokurorit të Speciales, Blerim Isufajt i cili është edhe kandidat për kryeprokuror të shtetit.

Kurti ka thënë se Isufaj po dëshiron të bëhet kryeprokuror pa dëshirën e qeverisë dhe presidencës.

“Ky dëshiron të bëhet kryeprokuror përkundër vullnetit të qeverisë, presidencës e kryeparlamentarit”.

Tutje ai ka thënë se Isufaj nuk e ka asnjë rast të fituar në gjykatë.

Ai ka përmendur edhe rastin e Dino Hasanajt për të cilin tha se prokurori Isufaj e ka cilësuar vrasjen e tij si vetëvrasje.

“Unë nuk kam dyshim që në prokurorinë e shtetit dhe atë sa më lart aq më shumë, ekziston një disponim negativ ndaj qeverisjes sonë. Dhe kjo lidhet më shumë se askë tjetër me figurën e prokurorit Blerim Isufaj. Një prokuror i njohur në skenën publike i cili rastin e vrasjes së Dino Hasanajt e karakterizoi në vetëvrasje” tha Kurti në seancën e sotme të kuvendit. /GazetaInsajderi