Ndërmjetësuesi i BE-së, për dialogun, Miroslav Lajçak, është deklaruar pas takimit me kryenegociatorët Bislimi e Petkoviq.

Ai tha se sot patën diskutime të dobishme për progress në shumë pika.

Këtë, Lajçak e shkroi në një reagim të tij në platformën X, ndërsa flet për takimin si raund tjetër i bisedimeve Kosovë-Serbi.

”Sot prita kryenegociatorët, të Kosovës, Besnik Bislimi dhe atë të Serbisë, Petar Petkoviq, për një raund të takimeve të dialogut në Bruksel. Diskutimet tona ishin të dobishme për të bërë përparim në një sërë çështjesh në agjendën tonë””, tha ai.

Today, I hosted the Chief negotiators of Kosovo @BislimiBesnik and Serbia @PetkovicPetar for a round of Dialogue meetings in Brussels. Our discussions were helpful to make progress on a number of issues on our agenda. pic.twitter.com/4zpkH0wbrM

— Miroslav Lajčák (@MiroslavLajcak) November 16, 2023

Ndryshe, Bislimi e ka konfirmuar se në takim me Lajçakun është diskutuar për një plan të sekuencuar të zbatimit të Marrëveshjes për normalizim të marrëdhënieve mes dy vendeve, si dhe për aneksin e zbatimit.

Palët kanë arritur pajtueshmëri për këtë Marrëveshje në shkurt në Bruksel, ndërsa për aneksin e zbatimit, në mars në Ohër.

“Gjatë javës së kaluar, zoti Lajçak na e ka sjellë një draft të ri, i cili e fut për herë të parë paralelizmin e plotë në zbatimin e Marrëveshjes, apo zbatim më të balancuar, dhe ne jemi përpjekur që për këtë draft t’i japim komentet finale, në mënyrë që i njëjti të jetë i pranueshëm edhe për palën tonë. Mendoj se ka pasur gatishmëri të madhe të Lajçakut që t’i akomodojë propozimet tona dhe të gjitha janë argumentuar mirë në detaje”, ka thënë Bislimi, pas takimit.