Opera e Kosovës dhe Universiteti i Prishtinës – Fakulteti i Arteve, Dega e Artit Muzikor prezantojnë operën komike në tri akte nga Joseph Haydn, “Lo Speziale” (Farmacisti).

Lo Speziale është opera e dytë e Haydn-it, e shfaqur për herë të parë në shtator të vitit 1768 për hapjen e shtëpisë së re të operës në Eszterháza (Hungari). Libreti është shkruar nga Carlo Goldoni dhe paraqet një skenar zbavitës. Është një trinom dashurie në mes 4 personazheve.

Regjisore e kësaj opere do të jetë Elikona Hysaj-Shala.

Kasti i tri shfaqjeve të cilat do të jepen më 5, 6 dhe 7 korrik prej orës 20:30 në Teatrin ODA në Prishtinë janë studentë të klasës së muzikës kamerale me Prof. Besa Llugiqi. 4 personazhet e “Lo speziale” do të personifikohen nga: Harris Bajraktari – bariton në rolin e Sempronios, sopranot Elvira Mazhiqi, Urta Haziraj dhe Aurela Krasniqi në rolin e Griletës, Rizah Jahaj – tenor në rolin e Mengones dhe mexosopranot Dija Sadiku, Andra Rexhepi në rolin e Volpinos.

Orkestra e Operës së Kosovës do të dirigjohet nga mjeshtri britanik Chris McCraken. Ky projekt është pjesë e kalendarit të aktiviteteve në kuadër të Universitetit Veror 2023.