Në Komunën e Podujevës, Drejtoria për Planifikim Urban dhe Mbrojtje të Mjedisit ka filluar shtrimin me asfalt në fshatin Majac, por, për qudi duke përfshirë edhe rrugët private të banorëve.
Kjo kontratë u nënshkrua në qershor të këtij viti, me një çmim të kontratës prej 136 mijë euro.
“Çmimi total i punëve duhet të jetë 136.679.57euro”, thuhet në kontratë.
Por, Komuna e Podujevës, përkatësisht Drejtoria e Urbanizmit këtë vlerë të paraparë të çmimit për shtrimin e rrugëve në Majac, po e shfrytëzon edhe për shtrimin e rrugëve private të qytetarëve.
“Tu u shtrua rrugët në prona private nëpër oborre, Komuna s’ka të drejtë në prona private me shtrua rrugë”, tha asambleisti i LDK-së, Ekrem Rrahmani për Insajderin.
“Nuk ka asnjë logjik me pare tonat, të tatimpaguesve me shtrua rrugë private e oborre“, tha tutje Rrahmani.
Derisa, sipas pamjeve të dërguara në Gazetën Insajderi, veç se ka filluar rregullimi i rrugëve, në pronat private të fshatit Majac të Podujevës.
Gazeta Insajderi ka provuar të kontaktojë me Drejtorin e Urbanizimit në Komunën e Podujevës, Leutrim Krasniqin, por deri në publikimin e këtij teksti, nuk ka marrë ndonjë përgjigje.