Më 20 korrik të vitit të kaluar, ministri i Punëve të Brendshme, Xhelal Sveçla, shkruante në profilin e tij për një aksion të Policisë në veri, në të cilin ishin sekuestruar 50 kilogramë drogë.
“Është shkatërruar me sukses laboratori i radhës i substancave narkotike në Zubin Potok, fshati Kovaçi. Nga njësitet relevante deri tash janë arrestuar 6 persona, (5 të etnisë serbe dhe 1 i etnisë gorane) si dhe janë sekuestruar 50 kg marihuanë e gatshme dhe 100 fije duke u përpunuar”, shkruante Sveçla, transmeton Gazeta Insajderi.
Lexo edhe:
Shtatë muaj më pas, Prokuroria Speciale e Republikës së Kosovës ka ngritur aktakuzë në Gjykatën Themelore në Prishtinë – Departamentin Special, kundër gjashtë të pandehurve me inicialet D.Gj, D.T, N.N, LJ.M, K.Gj dhe B.Gj. veprën penale: Kultivimi i bimës së hashashit, shkurres së kokainës ose bimëve të kanabisit.
“Gjatë muajit korrik 2022, në fshatin Kovaçi, Komuna e Zubin Potokut, në bashkëpunim janë marrë me kultivimin e bimëve narkotike, në një laborator të improvizuar brenda shtëpisë të njërit nga të pandehurit”, tuhet në njoftimin e Prokurorisë Speciale, shkruan Gazeta Insajderi./Gazeta Insajderi/