Lulzim Fejzullahu humbi jetën si shkak si sulmit brutal nga dy të mitur, 16 vjeçar, Elton Kadriu dhe Artiol Abdullahu. Të njëjtëve iu është caktuar masa e paraburgimit. Por njëri prej tyre po del se ka qenë i njohur për organet e drejtësisë, shkruan Insajderi.
Në media u raportua se Elton Kadriu kishte qenë edhe më parë në paraburgim për veprën penale “lëndim i rëndë trupor”.
Lidhur me këto informata ka reaguar zëdhënësi i SHKK, Florent Gashi.
Ai tha për Insajderin se nga SHKK nuk ka lëshuar një deklaratë të tillë.
Sipas tij kjo është përgjigja zyrtare nga ky organ.
“Bazuar në Ligjin nr. 08/L-131 për Shërbimin Korrektues të Kosovës, nenin 64, paragrafi 2, si dhe në mbështetje të Kodit nr. 06/L-006 të Drejtësisë për të Mitur, neni 47, duke pas parasysh shkaqet e sigurisë, si dhe me qellim të parandalimit të dëmtimit eventual të të drejtave dhe lirive të personave tjerë, Shërbimi Korrektues i Kosovës nuk mund të deklarohet lidhur me rastin në fjalë“, ka thënë Gashi.
Që ka pasur vepra penale edhe më herët ka thënë edhe kryetari i Podujevës Shpejtim Bulliqi.
Bulliqi më konkretisht ka folur për njërin prej tyre, ka thënë se ka qenë i dënuar me 3 vjet burgim.
Ai tha se i njëjti dyshohej për 9 vepra të ndryshme penale.
“Njëri prej individëve që dyshohet se është pjesë e këtij rasti, është nxënës i një shkolle të mesme në qytetin e Podujevës, ndërsa tjetri ka dy apo tri vite që ka qenë nxënës i shkollës, i cili për sjellje jo të mira është larguar nga shkolla dhe ka braktisur shkollimin e mëtejshëm pas disa veprave që i ka bërë qoftë në shkollë, qoftë në ambientet tjera. U informuam nga organet e rendit, të cilat e kanë kryer punën e tyre, kanë iniciuar rastet”, ka thënë ai.
Ndërkohë, i dyshuari tjetër A.A. nuk ka pasuar ndonjë periudhë në institucione korrektuese më parë, sipas informacioneve nga Shërbimi Korrektues.
Klikoni KËTU për t´u bërë pjesë e kanalit zyrtar të Gazetës Insajderi në Viber.