Në një takim me liderët afrikanë, presidenti rus Vladimir Putin ka thënë se Rusia e tërhoqi ushtrinë e saj nga Kievi vitin e kaluar sepse asaj iu “kërkua të krijonte kushtet” për nënshkrimin e një marrëveshjeje paqeje.

“Në thelb, një draft i kësaj marrëveshjeje (paqes) u ra dakord. Por pas tërheqjes së trupave tona nga afërsia e Kievit, nga e cila na u kërkua të krijonim kushte për përfundimin e një marrëveshjeje përfundimtare, autoritetet e Kievit hodhën poshtë të gjitha marrëveshjet e mëparshme”, ka thënë Putin.

Kanali “Sota” në Telegram bëri të ditur se fragmenti me deklaratat e Putinit për tërheqjen e trupave ruse nga Kievi u “zhduk” nga Telegrami i Kremlinit, megjithëse fillimisht ishte i pranishëm në regjistrim dhe aktualisht nuk është i disponueshëm në transkriptin e tekstit në faqen e Kremlinit.

Në korrik 2022, Putin pretendoi se rusët ishin tërhequr nga kryeqyteti ukrainas “për të krijuar kushte për negociata”.

Gjatë një takimi me liderët afrikanë, Putini ka thënë se “statusi neutral” i Ukrainës është i një rëndësie thelbësore për Rusinë.