Deputeti i Lëvizjes Vetëvendosje, Armend Muja ka krahasuar vitin 2020 të qarkullimit të bizneseve me vitin 2023. Ai tha se ka pasur rritje 66.5 për qind.

Por, deputeti i pushtetit nuk e përmendi faktin që  gjatë periudhës së pandemisë një pjesë e madhe e bizneseve ishin mbyllur ose kishin punuar me orar të reduktuar.

“Qarkullimi i bizneseve në Kosovë – bazuar në të dhënat preliminare të ATK-së, bizneset e Kosovës kanë raportuar qarkullim vjetor të vitit paraprak 2023 rreth 20 miliardë €, rritje kjo prej 66.5% krahasuar me vitin 2020. Tendenca e re është që deri në fund të mandatit të Qeverisë Kurti II qarkullimi i bizneseve do jetë dyfishi në terma absolut krahasur me vitin 2020.”, ka shkruar Muja.

Tutje, ai tha se edhe kontributi i bizneseve në tatim ka ndryshuar nga viti 2020 me vitin 2023.

“Ngjashëm, kontributi i bizneseve në kuadër të tatimit në të ardhura të korporatave u dyfishua nga 85.3 milionë sa ishte në vitin 2020 në 183.8 milionë në vitin 2023. Rend e ligj, tatime tek shteti, e shteti shërbime për biznesin.”, ka shkruar ai në Facebook.