Një rast i rëndë ku është përdorur dhunë fizike ka ndodhur në një nga shtëpitë e të moshuarve në Kosovë. Lidhur me rastin janë arrestuar tre të dyshuara.

Zëdhënësi i Policisë për rajonin e Pejës, Fadil Gashi, ka njoftuar se numri i të arrestuarve për rastin e dhunës dhe keqtrajtimit në Pejë ka shkuar në tre.

Të dyshuarat ngarkoehn me tri vepra penale dhe ndaj të njëjtave është caktuar masa e ndalimit.

“Janë arrestuar tre persona si të përfshirë në rast. Të dyshuarit ngarkohen me tri vepra: sulm, ndihmë në sulm dhe incizim i paautorizuar. Ndaj tre të dyshuarve është caktuar masa e ndalimit”, tha ai.

Siç ka mësuar Insajderi, e moshuara është nëna e dëshmorit, Taulant Nura, i cili është vrarë gjatë luftës në betejën e qytetit të Gjakovës.

“Kjo gruaja e sulmuar është nëna e dëshmorit Taulant Nura i vrarë në maj 99-ës në betejën e qytetit të Gjakovës, i tha ky burim Insajderit.

Gazeta Insajderi ka mësuar se dhunuesja kryesore që shihet në këtë video është Aurona Pelaj nga fshati Novosellë.

Pelaj shihet duke e goditur me shuplaka në fytyrë, pa pikë mërie të moshuarën.

Pamjet e rënda janë publikuar nga aktorja Kaltrinë Zeneli të martën.

“Orenda” Sh.P.K. është një biznes privat i cili merret me aktivitetet në shtëpitë e kujdesit për të moshuarit dhe personat me nevoja të veçanta.

Aksionarë të biznesit janë Anton Rasaj, Besmir Ahmetaj, Agron Kukaj dhe Esmira Kukaj.

Prokuroria Themelore në Pejë ka konfirmuar se ndaj dy dhunueseve është caktuar masa e paraburgimit prej 48 orëve.