Procesi i Prespës mund të jetë një shembull i zgjidhjes së mosmarrëveshjes midis Beogradit dhe Prishtinës, tha kryeministri maqedonas Zoran Zaev në Bruksel sot pas drekës së punës me Përfaqësuesen e Lartë të BE-së për Politikë të Jashtme dhe Siguri Federica Mogherini dhe krerët e Ballkanit Perëndimor.

Gjatë takimit, pati fjalë rreth zhvillimeve aktuale në Maqedoni në lidhje me ndryshimet kushtetuese, ligjin mbi amnistinë, procesin e pajtimit, por mbi çështjet rajonale, duke përfshirë çështjen e Beogradit dhe Prishtinës.

“Ne jemi të bindur se ne mund ta ndihmojmë të gjithë procesin me përvojën që kemi nga Procesi i Prespës, pasi kjo mund të jetë një përvojë për këtë çështje problematike në Ballkan,” tha Zaev.

Zaev tha se në drekë me krerët e Ballkanit Perëndimor u shpreh një konsensus i përbashkët për zgjidhjen e çështjeve dypalëshe në frymën e stabilitetit rajonal dhe se ata mund të ndihmonin njëri-tjetrin në këto procese, transmeton KP.

Në bisedë me presidentin e Këshillit Evropian Donald Tusk, Zaev mori garanci se me vazhdimin e procesit në Maqedoni, si dhe vazhdimin e reformave, Maqedonia do të marrë një datë për negociata në Këshillin Evropian në qershor.

Komisioni Evropian, shtoi ai, është plotësisht i informuar për procesin e pajtimit dhe e mbështet fuqishëm këtë proces.