Më 20 maj të vitit 1903 lindi në Shkodër, Ernest Koliqi, mësues, poet, romancier, eseist, përkthyes, gazetar, dramaturg, botues dhe pedagog. Cilësohet bashkë me Mitrush Kutelin, si bashkëthemelues i tregimit modern shqiptar, ndërkohë si Ministër Arsimi ka meritën për dërgimin e qindra mësuesve në Kosovë dhe trojet shqiptare jashtë kufijve shtetërorë të Shqipërisë.
Sot është 120 vjetori i lindjes së Ernest Koliqit, gjë që shënon një përvjetor jubilar të këtij kolosi të letërsisë dhe kulturës shqiptare.
Veprat më të njohura të E. Koliqit janë “Kushtrimi i Skanderbegut”, “Hija e maleve”, “Tregtar flamujsh”, “Pasqyrat e Narcizit”, “Kangjelat e Rilindjes”, “Shija e bukës mbrume” etj. Ai, po ashtu, ishte themelues dhe drejtues i tri revistave të rëndësishme të kohës, si “Shejzat”, “Ora e maleve” dhe “Shkendija”.
Kontributi i Koliqit në fushën e kritikës letrare dhe të historisë së letërsisë është i lidhur me emrin si titullar i katedrës së gjuhës dhe letërsisë shqipe në Romë, me themelimin e Institutit të Studimeve Shqiptare më 1940 në Tiranë, dhe me shndërrimin e katedrës së gjuhës dhe letërsisë në “Institutin e Studimeve Shqiptare” në Romë.
Më 1939 hapet në Universitetin Shtetëror të Romës Selia e Albanologjisë, ku Koliqi emërohet ordinar dhe qëndron i tillë derisa doli në pension. Ndërprerja e vetme disi e gjatë qe kur u emërua ministër Arsimi në vitet 1939-’41.
Koliqi vdiq në Romë më 15 janar 1975.