Skulptorë, ekonomistë, këngëtarë e studentë të ndryshëm janë bërë bashkë në një listë që e kanë quajtur Iniciativa Qytetare 41000 për të ndryshuar situatën politike në Skenderaj e mbi të gjitha mënyrën e qeverisjes.
Ata nuk kandidojnë për kryetar të komunës por vetëm për asamblistë. Në një komunikatë për media, Iniciativa Qytetare Dyzetenjëmijë thuhet se ka lindur si përgjigje ndaj situatës politike në Komunën e Skenderajt.
“Sot në Komunën tonë ekziston një parti e cila qe 17 vite fiton me mbi 90 përqind te votave dhe ekzistojnë disa parti që marrin pjesë në zgjedhje e që nuk kanë treguar as vullnet dhe as që kanë mundësi që ti bëjnë konkurrencë partisë në pushtet”, thuhet në këtë njoftim.
“Në të njëjtën kohë, kemi qytetarët e Komunës së Skenderajt të cilët gjithnjë e më shumë janë të pakënaqur me qeverisjen, transparencën, llogaridhënien, përfaqësimin, arsimimin dhe nivelin e demokracisë në komunën tonë”./Insajderi.com