Numri i viktimave nga tërmetet e fuqishme që goditën Turqinë dhe Sirinë më herët gjatë këtij muaji ka kaluar shifrën prej 50 mijë, sipas të dhënave të fundit të publikuara nga të dy shtetet.
Tërmetet e 6 shkurtit – prej 7.8 dhe 7.5 ballësh – kanë marrë jetën e 44 mijë e 218 personave në Turqi, sipas agjencisë shtetërore të lajmeve, Anadolu, që ka cituar agjencinë shtetërore të fatkeqësive.
Në Sirinë fqinje, numri i viktimave deri më tani është 5 mijë e 900.
Që prej tërmeteve të 6 shkurtit, sipas agjencisë turke të fatkeqësive natyrore, janë regjistruar mbi 9 mijë pasgoditje.
Pothuajse 530 mijë persona janë evakuuar vetëm nga zonat e prekura nga tërmetet në Turqi.