I fejuari i vlogeres amerikane të vrarë Gabby Petito, Brian Laundrie, u gjet i pajetë më shumë se një muaj më parë. Dje, avokati i familjes së tij ka bërë të ditur në një deklaratë shkakun e vdekjes së Laundrie, që është vetëvrasja.

Laundrie u kthye nga një udhëtim pa të fejuarën e tij dhe trupi i saj u gjet më vonë në Wyoming.

Trupi i Laundrie u identifikua muajin e kaluar duke përdorur të dhëna dentare. Ai kishte qenë në kërkim për disa javë përpara se të gjendej trupi i tij. Policia e kishte përshkruar atë si një person me interes për vdekjen e Gabby Petito-s.

“Chris dhe Roberta Laundrie janë informuar se shkaku i vdekjes ishte një plagë me armë zjarri… dhe mënyra e vdekjes ishte vetëvrasje”, tha avokati i familjes.

“Chris dhe Roberta janë ende në zi për humbjen e djalit të tyre dhe shpresojnë që këto gjetje të sjellin qartësi për të dyja familjet.”

Rasti i Petitos, 22 vjeç, dhe Laundrie, 23 vjeç, mori vëmendjen e medias mbarëkombëtare.

Çifti kishte dokumentuar në mediat sociale udhëtimin e tyre veror me një furgon nëpër parqe kombëtare.

Prindërit e Petitos e raportuan atë të zhdukur më 11 shtator, pasi nuk kishin mundur të kontaktonin me të për dy javë. Trupi i saj u zbulua përfundimisht në Wyoming, ku çifti kishte qenë duke udhëtuar, më 19 shtator. Një mjek më vonë zbuloi se ajo ishte mbytur.

Laundrie ishte kthyer në Florida pa Petiton më 1 shtator. Familja e saj vazhdimisht bëri thirrje që i fejuari dhe familja e tij të bashkëpunonin me hetuesit, por më pas ai u zhduk.

Prindërit e tij i thanë policisë se e kishin parë për herë të fundit më 13 shtator – kur ai doli për një shëtitje vetëm dhe nuk u kthye më.

Trupi i tij u gjet në një park në Florida më 20 tetor.