Luljeta Aliu – Krasniqi, analistja e cila mbronte krahun e pushtetit, është zgjedhur me 48 vota për anëtare e Komisionit të Pavarur për Media.
Vendim ky që nxiti reagime të shumta.
Qendra Evropiane për Liri të Medias dhe Shtypit është shprehur e shqetësuar me zgjedhjen e saj për anëtarë të Komisionit të Pavarur të Mediave.
Kjo pasi që sipas tyre Aliu ka qenë përkrahëse e Lëvizjes Vetëvendosje dhe nuk mund të jetë e pavaruar.
“Jemi të brengosur me vendimin e Kuvendit të Kosovës, i kontrolluar nga Lëvizja Vetëvendosje, për zgjedhjen e Luljeta Aliut si anëtare e KPM-së. Aliu rregullisht dhe publikisht e ka përkrahur Lëvizjen Vetëvendosje dhe politikat e tyre”, thuhet në reagim.
Edhe Asociacioni i Gazetarëve të Kosovës ka reaguar duke thënë se ka përcjellur me shqetësim votimin në Kuvend.
“Votimi nga partia në pushtet, Lëvizja Vetëvendosje e një avokateje publike të politikave të saj në Qeveri, tregon hapur intencën e partisë në pushtet për të vënë nën kontroll institucionet e pavarura mediale. Komisioni i Pavarur i Medieve duhet të ruajë pavarësinë politike dhe partiake, për të kryer në mënyrë të pandikuar punën për monitorimin dhe rregullimin e skenës audio-vizuale në Kosovë”, thuhet në reagimin e AGK-së.