Ishte viti 2016 kur Hysen Durmishi, tani zëvendësministër kërcënonte mediat, thoshte se “do t’i nxjerrin zvarrë”. Ai iu ishte sulur mediave për shkak publikimit të pamjeve në rastin e Astrit Deharit, ndërkohë që avokati dhe nëna e Astrit Deharit, deklaronin se nuk është faji i mediave për publikim. Një sulm i tillë veçse më brutal po vazhdon edhe sot kur me vendin po qeveris Qeveria Kurti.

Durmishi përdorte fjalë të rënda kundrejt mediave, i cilësonte kriminale, e që paralajmëronte fundin e tyre.

“Mos mendoni se harrojmë”, paralajmëronte ai.“Ju media të pushtetit a po mendoni ndonjëherë që i vie fundi edhe këtij pushteti kriminal. I vie fundi edhe këtij pushteti të Klanit Pronto. Do të ju vie fundi edhe juve bashk me ta. Mos mendoni se harrojmë. Më e pakta që duhet ta mendoni është që zvarrë do të nxjerrim e do të ju dërgojmë në burg o kriminel. Mos na lëndoni më shumë o të pështirë. Nuk ju falim kurr kriminel!”, shkruante ai në Facebook.

“Mos mendoni se harrojmë”, ishte fjalia e cila sot po merr edhe më shumë kuptim.

Qeveria që po udhëhiqet nga Albin Kurti ka propozuar një projektligj, i cili ka për qëllim kontrollin dhe ndëshkimin me gjobë të mediave.

Ndërkohë, Asociacioni i Gazetarëve të Kosovës (AGK) dhe Këshilli i Mediave të Shkruara të Kosovës i ka kërkuar Qeverisë së Kosovës që të tërheqë projektligjin për Komisionin e Pavarur për Media.

Kësaj thirrje iu janë bashkuar edhe organizatat prestigjioze ndërkombëtare dhe rajonale.

/Insajderi