Diplomati holandez, dikur ambasador në Kosovë, Robert Bosch ka deklaruar se situata në Veri të Kosovës mund të dalë jashtë kontrollit, shkruan Insajderi.

Këtë Bosch e thotë duke u bazuar në vendimin e NATO-s për rritjen e numrit të forcave në veri të vendit.

“Nuk e di nëse NATO ka informacion se situata mund të dalë jashtë kontrolli por duke pasur parasysh rritjen e numrit të trupave nuk mendoj se ata do të shtoheshin, nëse nuk do të kishte asgjë“, ka thënë ai për Insajderin.

Ambasadori holandez ka komentuar edhe vizitën e Sekretarit të Përgjithshëm të NATO-s, Jens Stoltenberg në Kosovë e Serbi.

“Vizita e Sekretari të NATO-s është gjithashtu një tregues i qartë se NATO e merr situatën seriozisht”, ka deklaruar Bosch.

Duke folur për situatën e sigurisë në vend e rajon, Bosch theksoi se rreziku i vërtetë vije nga Rusia.

“Shqetësimi dhe brenga më e madhe duhet të jetë Rusia“, potencoi ai.

NATO-ja miraton forca shtesë për shkak të tensioneve në veri të Kosovës

Aleanca Veri-Atlantike, dy muaj më parë konfirmoi se ka autorizuar forca shtesë në Kosovë për shkak të zhvillimeve të fundit në veri të vendit.

Në njoftimi thuhej se KFOR-i do të ndërmarr veprimet e nevojshme për të ruajtur një mjedis të sigurt dhe lirinë e lëvizjes për të gjithë njerëzit që jetojnë në Kosovë.

“Që nga maji, ne kemi rrit praninë e KFOR-it. Vetëm dje Këshilli i Atlantikut të Veriut autorizoi forca shtesë për të adresuar situatën aktuale”, thuhej në komunikatë.

Theksohej se KFOR-i vazhdon të koordinohet ngushtë me të gjitha palët, në Beograd, në Prishtinë, si dhe me Misionin e BE-së për Sundimin e Ligjit (EULEX), OSBE-në, Misionin e OKB-së në Kosovë dhe komunitetin diplomatik.

“U bëjmë thirrje të gjitha palëve që urgjentisht të de-përshkallëzojnë. Ne vazhdojmë t’i bëjmë thirrje Beogradit dhe Prishtinës që të angazhohen në dialogun e lehtësuar nga BE-ja, si e vetmja mënyrë për të zgjidhur çështjet e pazgjidhura dhe për të arritur zgjidhje që respektojnë të drejtat e të gjitha komuniteteve. Ky është çelësi për sigurinë e qëndrueshme në Kosovë dhe stabilitetin në rajon”, potencohet mes tjerash në komunikatë.