Policia e Kosovës përmes udhëheqësve të departamenteve të saj ka kërkuar nga zyrtarët policor që mos ta shfrytëzojnë për kalim territorin e Serbisë.
Këtë e ka bërë përmes një mesazhi në të cilin është kërkuar që të iu shpërndahet edhe kolegëve të tjerë.
Gazeta Insajderi ka siguruar mesazhin i cili është shpërndarë tek zyrtarët policorë nga udhëheqësit e departamenteve të ndryshme.
“Republika e Serbise është duke i ndaluar të gjithë pjesëtarët e Policisë së Kosovës që janë duke shfrytëzuar territorin e saj për kalim. Prandaj me qëllim që të mos jeni i ndaluar shmangeni pikëkalimet kufitara serbe. Shpërndaje këtë njoftimit tek kolegët tanë”, thuhet në mesazhin që ka siguruar Insajderi.
Gazeta Insajderi ka provuar të kontaktojë me Policinë e Kosovës për këtë çështje, por deri në këto momente nuk ka marrë ndonjë përgjigjie.
Rikujtojmë se gjatë ditës së sotme kanë mbetur të bllokuar 300 kosovarë në kufirin Kroaci-Serbi.
Në mesin e kosovarëve të bllokuar nëpër pikat kufitare në Serbi ishte edhe zëvendësdrejtori i Policisë së Kosovës, Dejan Jankoviq.
Ndalimi u bë pa ndonjë arsyetim dhe u liruan pas shumë orë pritje dhe maltretimi.
Përveç ndalimit, qytetarët e Kosovës po dënohen me gjoba të larta nga policia serbe.
Reagime të ashpra pati edhe nga spektri ndërkombëtar për ndalimin e 13 autobusëve me qindra kosovarë të cilët shfrytëzuan territorin serb për kalim në vendet europiane.