Pas rreth 20 orë maltretimi nga autoritetet serbe, më në fund janë liruar kosovarët që u ndaluan në pikën kufitare mes Serbisë dhe Kroacisë.

Gazeta Insajderi ka siguruar pamje të lëvizjes së autobusëve, të cilët aktualisht ndodhen në territorin e Kroacisë.

”Jemi në Kroaci. Gjendja e udhëtarëve është relativisht e mirë”, tha njëri nga udhtarët e maltretuar nga autoritetet shtetërore të Serbisë.

Reagime të ashpra pati edhe nga spektri ndërkombëtar për ndalimin e 13 autobusëve me qindra kosovarë të cilët shfrytëzuan territorin serb për kalim në vendet europiane.

Ndalimi u bë pa ndonjë arsyetim dhe u liruan pas shumë orë pritje dhe maltretimi.

Përveç ndalimit, qytetarët e Kosovës po dënohen me gjoba të larta nga policia serbe.

Derisa, Ministria e Punëve të Jashtme ka kërkuar nga qytetarët e vendit tonë që ta evitojnë maksimalisht kalimin përmes territorit të Serbisë.

I gjithë ky reagim nga shteti serb po bëhet një ditë pasi Kosova kaloi edhe një votim me rëndësi për pranim në KiE.

/Insajderi.org/