Kombëtarja e Kosovës e ka mposhtur Lihtenshtajnin, me rezultat bindës 4:0, në ndeshjen e parë miqësore që u zhvillua sot në Kampin Nacional në Hajvali.

Trajnerja Anneli Andersen hodhi në fushë formacionin me këtë në përbërje: Besarta Leci, Rrezona Ramadani, Valentina Limani, Lumbardha Misini, Albulena Guri, Erëleta Memeti, Merita Bajrami, Feride Kastrati, Kaltrina Biqkaj, Donjeta Halilaj dhe Edona Kryeziu.

Dardanet patën paraqitje të mirë duke dominuar që nga fillimi, por golin e epërsisë e arritën në minutën 41-të nëpërmjet Erëleta Memetit.

Kosova pati edhe disa raste në pjesën e parë por që nuk arriti t’i konkretizoi.

Dardanet nuk e ndryshuan ritmin as në pjesën e dytë, edhe pse trajnerja bëri ndryshime në formacion.

Pak minuta pasi filloi kjo periudhë e lojës, Kosova përfitoi penallti në minutën 58, të cilën me saktësinë e ekzekutoi Feride Kastrati, për rezultatin 2:0.

Tre minuta më vonë Kaltrina Biqkaj e shtoi epërsinë në 3:0, me çka Kosova veçse e vulosi fitoren. Megjithatë, as kjo epërsi e lartë nuk i ndali Dardanet, të cilat luajtën pa presion dhe në minutën e 87-të Jehona Shala shënoi për 4:0, me të cilin rezultat edhe përfundoi takimi.

Ndeshjen e dytë miqësore kundër Lihtenshtajnit, Kosova e zhvillon të dielën nga ora 11:30 po ashtu në Kampin Nacional në Hajvali.

Këto miqësore i shërbejnë Kosovës të përgatitet për ndeshjet kualifikuese të Ligës së Kombeve që nisin në shtator.