Igball Jashari nga familja legjendare e Jasharajve është rrugës për t’u bërë një futbollist i spikatur. Për Gazetën Insajderi, Jashari ka ndarë detaje për fillimet e karrierës së tij prej futbollisti. Ndër tjerash, ai ka treguar edhe në cilin ekip dëshiron ta shoh duke luajtur gjyshi i tij, përkatësisht Rifat Jashari, vëllai i Komandantit Legjendar Adem Jashari.

Igball Jashari, nipi i komandantit legjendar, Adem Jashari aktualisht po luan me ekipin e Prishtinës.

Siç tregon vet ai, ushtrimet i ka të kombinuara – me juniorët dhe me ekipin e parë, por luan me juniorët.

“Stërvitjet po shkojnë mjaft mirë! Jam duke luajtur në ekipin e Prishtinës, stërvitjet i kam të kombinuara me junioret dhe ekipin e parë, ndërsa ndeshjet i zhvilloj me juniorët” – tha Jashari për Gazetën Insajderi.

Ai thotë se ndihet mjaft krenar që është pasardhës i familjes Jashari, duke nënvizuar se emrin e axhës së tij e mban me përgjegjësi të madhe.

“Unë ndihem mjaft krenarë që jam pasardhës i familjes Jashari, poashtu ndihem mjaft krenar që e mbaj emrin e axhës tim Igball ,por në të njëjtën kohë kisha me thënë që është edhe përgjegjësi e madhe” – shtoi ai.

Derisa, Igball Jashari thekson se me sport është marrë edhe axha i tij, nga i cili beson se i ka trashëguar aftësitë prej futbollisti.

“Me futboll nga familja Jashari është marrë axha im, i cili ka qenë një lojtarë shumë i mirë e si duket e kam trashëguar nga ai pjesën e futbollit“.

Futbollisti i Jasharajve tregon se prej mbështetësve me të mëdhenj të tij është gjyshi Rifat Jashari. Siç shpjegon futbollisti i Prishtinës, dëshira e Jasharit është ta shoh nipin duke luajtur për skuadrën e Bayern Munich.

“Gjyshi im gjithmonë është një suportues i madh i imi, dhe dëshira e gjyshit tim është qe unë një ditë të luaj në Bayern Munchen” – tha Jashari për Insajderin.

Në anën tjetër, ishte planifikuar që Igball Jashari të transferohej në Gjermani. Ishin Leipzigu dhe Stuttgarti klubet që kishin shprehur interesim për shërbimet e tij.

Por, ky transferim nuk u bë. Jashari bëri të ditur se provat i ka kryer, por ende nuk ka asgjë konkrete.

“Provat i kamë kryer, jemi në kontakt, por nuk ka asgjë konkrete“- bëri të ditur numri 9-të i Prishtinës.

Ai shton se ëndrra e tij e vetme është që të luaj për Përfaqësuesen e Kosovës.

“Ëndrra ime është që një ditë te luaj për Kombëtaren e Kosovës dhe sadopak ta jap kontributin tim për Kombëtaren e zemrës sime” – përfundoi ai.

Igball Jashari është pjesë e Përfaqësueses së Kosovës U-17.

GAZETA INSAJDERI