Policia e Kosovës ka arrestuar mjekun e Qendrës Kombëtare të Transfuzionit të Gjakut, Betim Morinën. Morina dyshohet se e ka kërcënuar kolegen e tij të punës, shkruan Insajderi.
Detaje për rastin janë dhënë edhe përmes raportit 24 orësh teksa bëhet me dije se i njëjti ashtu siç raporti Insajderi, ka kërkuar tretman mjekësor e që po ruhet nga Policia në QKUK.
“Prishtinë 11.04.2024-11:34. Është arrestuar i dyshuari mashkull kosovar, pasi që dyshohet se i njëjti përmes telefonit ka kanosur viktimen femër kosovare. Lidhur me rastin është njoftuar prokurori me vendim te te cilit i dyshuari dërgohet në mbajtje. I dyshuari ka kërkuar tretman mjekësor dhe është transferuar në QKUK, ku pas ekzaminimeve mjekësore i njëjti është pranuar për kurim te metutjeshem dhe është nën përkujdesje policore deri në vendimin e ardhshëm”, bëhet me dije nga policia.
Shkak i kërcënimit po del të jetë kontrata e punës.
Prokurori i Prokurorisë Themelore në Prishtinë gjatë ditës së djeshme i kishte caktuar Morinës masën e ndalimit prej 48 orësh.
Por pas shqiptimit të kësaj mase, i njëjti sipas informacioneve kishte kërkuar të dërgohet në spital duke thënë se nuk e ka gjendjen e mirë shëndetësore.
Për rastin, Insajderi ka provuar të marrë një përgjigje edhe nga drejtoresha e QKTGJ-së, Bukurije Zhubi, por e njëjta nuk është përgjigjur.
Ky nuk është rasti i parë që ky mjek bie në pranga të policisë. Edhe në vitin e kaluar ai ishte arrestuar për veprën penale “lëndim i rëndë trupor”.
I njëjti e kishte shkelmuar derën e zyrës së një punonjëse në QKKTGJ.