Kanë kaluar tri ditë që kur një 8 vjeçar po trajtohet në Klinikën Intensive të QKUK-së si pasojë e plagëve të marra nga goditja me veturë nga ana e një shoferi të papërgjegjshëm. Për gjendjen e tij shëndetësore, edhe sot Insajderi e ka kontaktuar drejtorin e klinikës, Shaqir Uka.
Uka konfirmoi se gjendja e tij është stabile por që po vazhdon të mbahet me aparatura mjekësore.
Shtoi se lëndimet janë serioze.
“Deri në ora 09:00 kam qenë në spital, deri në atë orë pacientit që ju i referoheni është duke vazhdu të mbahet ngjitur me aparaturat mjekësore, gjendja e përgjithshme e parametrave vital ishte realitivisht stabile, pavarësisht që lëndimet janë serioze”, tha ai për Insajderin.
Uka shtoi se i njëjti po vazhdon të marrë tretmanin mjekësor dhe mbetet i monitoruar nga stafi mjekësor i mjekimit Intensiv.
8 vjeçari, bën me dije drejtori se ka pasur një ndërhyrje në regjionin e kokës gjegjësisht në indin trunor dhe disa ndrydhje në regjionin e gjoksit.
Si kishte ndodhur rasti?
Ishte ora 14:44 e së dielës kur dy të miturë dhe dy persona të moshës madhore u goditën nga një veturë, të cilën po e voziste në gjendje të dehur, Kujtim Miftari.
Ai kishte tentuar të ikte nga vendi i ngjarjes, por që kishte kaluar veç 200 metra, aty ishte ndalur nga qytetarët për ta dorëzuar në polici.
Pas prezencës në polici, 24 vjeçari i është bërë testi i alkoolit, i cili ka rezultuar me 0.61 promilë.
Për aksidentin e shkaktuar ai do të hetohet për veprën penale “Ngasje në gjendje të paaftë apo të dehur”.
Në kërkesën për paraburgim, kuptohet se personi në fjalë është i njohur për organet e rendit. Ka të kaluar kriminale, pra është recidivist. Dyshohet për një numër të konsiderueshëm të veprave penale.
“I njëjti është i dyshuar edhe për veprat penale të ndryshme siç janë: lëndim i lehtë trupor; blerja posedimi shpërndarja dhe shitja e paautorizuar e narkotikëve, substancave psikotrope dhe analoge; sulmit; grabitje; mbajtja në pronësi, kontroll ose posedim të paautorizuar të armëve; si dhe posedim i paautorizuar i narkotikëve”, bëhet me dije nga kërkesa për paraburgim.
Tutje thuhet “i pandehuri, duke qenë në gjendje të dehur të paaftësisë, e tejkalon veturën që ishte para tij, duke dalë kështu në shiritin e djathtë e gjithashtu duke përfunduar në trotuar ku fillimisht i godet dy të dëmtuarit (te mitur) O.S dhe A.S, e më pas i godet edhe të dëmtuarit në motocikletë D. H dhe P. V, dhe pas rastit largohet nga vendi i ngjarjes diku 200m larg vendit të ngjarjes. Përreth diku 200m më larg, ku edhe është ndaluar nga qytetarët deri në ardhjen e policisë, duke i lënë të dëmtuarit në gjendje të rëndë shëndetësore.
Duke i pasur për bazë këto fakte, Prokuroria ka kërkuar që ai të dërgohet në paraburgim sepse sipas tyre “ekziston rreziku real se ne rast se i njëjti lihet të mbrohet në liri mund ta përsëris vepra të ndryshme penale”.
Si rrjedhojë ndaj të njëjtit është kërkuar masa e paraburgimit prej 1 muaj.
Lexo edhe:
/Insajderi