Ministri i Punëve të Brendshme, Xhelal Sveçla, ka publikuar disa fotografi në profilin e tij të realizuara gjatë qëndrimit të tij në pjesën veriore të Kosovës ku nesër do të mbahen edhe zgjedhjet lokale.

Sveçla ka shkruar se tashmë ajo pjesë e Republikës së Kosovës frymon ndryshe.

“Tashmë kjo pjesë frymon më ndryshe”, ka shkruar Sveçla.

Në vizitën e Sveçlës atje merrte pjesë edhe ministri i Bujqësisë, Faton Peci, deputeti Armend Muja dhe të tjerë.

Bashkë e kanë realizuar një foto mbi Urën e Ibrit, urë kjo që tash e sa kohë mbikëqyret nga KFOR-i.

Pas këtij momenti kanë shpërthyer shakatë në rrjet.

Gazetari Berat Buzhala bën këtë reagim: Shihmi more qysh po doken: Arnold Shvarcenegeri, Silvister Stalone dhe Van Dami. Djem, kthene kryet se do flamura qanej nuk po doken tonet.

Derisa gazetarja Dafina Demaku shkruan: Oleksey Reznikov dhe Mykola Solskyoi (ministri i brendshëm ukrainas dhe ai i Bujqësisë) OUTLET

Nesër në katër komunat veriore të Republikës së Kosovës do të mbahen zgjedhjet lokale. Për këtë gjë, institucionet e Republikës së Kosovës kanë bërë të gjitha përgatitjet.

Ndërkohë Lista Serbe ka vendosur që të bojkotojë këto zgjedhje, gjë për të cilën edhe është kritikuar shumë nga ndërkombëtarët.

Bashkimi Evropian në mënyrë të përsëritur kanë shprehur zhgënjimin për faktin se Lista Serbe ka vendosur të bojkotojë zgjedhjet lokale.

Edhe Shtetet e Bashkuara të Amerikës në të njejtën frymë me BE-në kanë kritikuar qëndrimin e partisë së Goran Rakiqit. Përmes Gabriel Escobar kanë theksuar se pavarësisht refuzimit të Listës Serbe, SHBA-ja do t’i njohë këto zgjedhje lokale.

Derisa kutitë e votimeve do të hapen nesër në mëngjes, retorika në mes të krerëve të institucioneve të Kosovës dhe zyrtarëve në Serbi është ashpërsuar.