Kryetari i Lëvizjes Vetëvendosje, Visar Ymeri nëpërmjet një statusi në Facebook ka uruar anëtarësimin e Kosovës në UEFA, por i është shmangur urimit të kombëtares të Kosovës.

“Pranimi në UEFA është lajm i mirë për sportistët dhe qytetarët e Kosovës. Jemi të gëzuar sa herë që vendi ynë njihet ndërkombëtarisht, në çfarëdo fushe”, ka shkruar Ymeri.

Ai nuk ka përmendur askund kombëtaren e Kosovës e as faktin nëse futbollistët kosovar që luajnë jashtë vendit duhet të jenë pjesë e ekipit të Kosovës në futboll.

Në vend të kësaj Ymeri, ka shkruar sesi futbollistët e Kosovës duhet ta rrisin cilësinë e futbollit.

“Ekipet dhe futbollistët e Kosovës duhet ta shfrytëzojnë anëtarësimin në UEFA për ta ngritur tutje cilësinë e futbollit në Kosovë”, ka shkruar Ymeri.

Ekipin e Kosovës nuk e ka përmendur askund as kryetari i Prishtinës, Shpend Ahmeti.

Madje ai në versionin e parë të statusit të tij në Facebook, nuk e ka përmendur fare faktin e pranimit të kombëtares së Kosovës në UEFA.

“Me këtë pranim rritet motivimi i secilit lojtar që luan në ligen e Kosovës…”, ka shkruar fillimisht Ahmeti duke ngjallë reagim tek një qytetar që e ka pyetur për “cilin pranim” e ka fjalën.

Ahmeti është detyruar ta ndryshojë këtë fjali duke shkruar “Me pranimin e Kosovës në UEFA rritet motivimi i secilit lojtar që luan në ligen e Kosovës…”

Por edhe ky si Ymeri nuk e ka përmendur kurrkund kombëtaren e Kosovës.