“Chopin Piano FEST Prishtina”, festivali i muzikës klasike që mbahet tash e disa vite me radhë në Prishtinë, këtë vit shënon edicionin e 13-të. Për një muaj rresht, nga data 9 maj deri më 9 qershor, në Amfiteatrin e Bibliotekës Universitare do të bëhen bashkë artistë nga vende të ndryshme të botës.

Ky festival është themeluar në vitin 2010, në 200 vjetorin e Shopenit, nga Shoqata Chopin e Kosovës, si anëtari më i ri i Federatës Ndërkombëtare të Shoqatave Chopin, pjesë e UNESCO-s.

Suksesi i madh dhe vlerësimi i audiencës më të madhe në Kosovë e shndërroi festivalin në një markë që tashmë tradicionalisht mbahet çdo vit në pranverë. Ky vit shënon edicionin e 13-të përpjekjeve të vazhdueshme për ta mbajtur audiencën të kënaqur dhe që muzika klasike të lulëzojë mirë në të ardhmen.

Programi i edicionit më të ri është publikuar në rrjetet sociale të festivalit, megjithatë janë disa data specifike që karakterizojnë kalendarin artistik, ndër këto data është edhe ajo e 29 majit në të cilën do të performojë edhe trupa e Filharmonisë së Kosovës.