Gjykata Themelore në Gjakovë e ka dënuar me tetë vjet burgim të pandehurin Sh. P. për vepër penale “Lëndimi i rëndë trupor” ndaj ish-bashkëshortes së tij.
Në njoftimin e gjykatës bëhet e ditur se i pandehuri Sh. P., me datë 19 dhjetor 2021 rreth orës 19:00 në Gjakovë, me mjet të fortë i ka shkaktuar lëndime të rënda trupore ish bashkëshortes e tij të dëmtuarës A. A., pastaj i pandehuri e kishte kapur për fyti e kishte gjuajtur për dysheme deri sa të dëmtuarës filloi t’i humbë vetëdija.
“Për një moment kur fillon të kthjellet e njëjta ngritët dhe mundohet të ikë, por i pandehuri arrin ta kapë për flokë dhe merr një tavolinë druri e godet në kokë dhe pjesë tjera të trupit deri sa e dëmtuara mbetet e shtrirë për dysheme pa ndjenja dhe tërësisht e gjakosur, e më pas nga ambulanca e dëmtuara dërgohet fillimisht në spitalin ‘Isa Grezda‘ në Gjakovë e nga spitali për shkak të gjendjes së rëndë shëndetësore dërgohet për trajtim të mëtutjeshëm në QKUK-Prishtinë”, thuhet në njoftimin e gjykatës.