Një ditë pasi që Gazeta Insajderi, ka publikuar skandalin e Administratës Tatimore të Kosovës për shlyerjen e 7 milionë eurove ndaj kompanisë së oligarkut Saimir Mane, ATK ka kërkuar nga Prokuroria e Shtetit nisjen e hetimeve.
Insajderi nga burime brenda prokurorisë ka siguruar kërkesën e ATK-së, e cila i është dërguar kryeprokurorit Aleksander Lumezi.
“Me qëllim të ruajtjes së integritetit të ATK-së, kërkojmë trajtim të shpejtë të këtij rasti, sepse do të ishte shumë me interes për institucionin”, thuhet në kërkesën e ATK-së.
Kërkesën dërguar prokurorisë e konfirmoi edhe Administrata Tatimore e Kosovës.
“ATK sot ka dorëzuar kërkesën në Prokurorinë e Shtetit me numër protokolli 12-06-3983 përmes së cilës kërkon nga prokuroria që të hetoj pretendimet e gazetës Insajderi, lidhur me shkrimin e publikuar dje me datë 26.11.2020”.
“ATK mbetet e gatshme të bashkëpunojë me organet e drejtësisë për sqarimin apo hetimin e çfarëdo rasti përfshirë, si dhe rastin konkret”, thuhet në njoftimin e ATK.
Gazeta Insajderi ka raportuar të mërkurën për skandalin e madh të ATK-së, i cili institucion e ka ngarkuar fillimisht me mbi shtatë milionë euro borxhe tatimore NewCo Ferronikelin, kompaninë në pronësi të Saimir Manes.
Por një proces i dyshimtë, pjesë e të cilit ishte hetuesi që kishte zbuluar skemën e mashtrimit financiar, ia ka fshirë ato.