Shtatë zyrtarë komunal dhe dy biznesmen janë arrestuar pasditen e hënë pasi krimet ekonomike zbarkuan në Lipjan me vendim të Gjykatës Themelore në Prishtinë. Në mesin e nëntë personave të arrestuar për keqpërdorime përgjatë punimeve të stadiumit futbollistik në fshatin Magure Komuna e Lipjanit është edhe biznesmeni Metë Bytyqi. Përpos tij, Gazeta ka publikuar ekskluzivisht edhe emrat e personave tjerë të arrestuar.

Policia e Kosovës, Departamenti për Krime Ekonomike ka arrestuar të hënën nëntë persona si të dyshuar se kanë kryer veprën penale ‘’Keqpërdorimi i pozitës apo autoritetit’’ dhe veprën penale të ‘’Mashtrimit’”. Shuma që po akuzohen se kanë përfituar është 300 mijë euro.

Në mesin e të arrestuarve është edhe pronari i kompanisë përfituese, biznesmeni Metë Bytyqi. Sipas ARBK’së Bytyqi është pronar i dy kompanive që janë kontraktuar në fazën e dytë të punimeve për Rregullimin e stadiumeve në Dobrajë të Madhe dhe Magure, shkruan Gazeta Insajderi.

Operatorët Ekonomik, “KONAKU GROUP SH.P.K.” dhe “N.P. KONAKU”, kanë fituar tenderin e hapur nga komuna e Lipjanit në vlerë 118 114,03 Euro për rregullimin e stadiumeve.

Zyrtarët komunal të arrestuar kanë bërë pranimin e punimeve të stadiumit futbollistik në fshatin Magure Komuna e Lipjanit, kinse janë kryer punimet sipas kontratës së fituar nga kompania “Konaku Group Sh.p.k” pa u kryer fare.

Kush janë personat e tjerë të arrestuar

Gazeta Insajderi ka zbuluar emrat e nëntë personave të arrestuar:

Kushtrim Salihu

Xhelil Murati

Labinot Dedushi

Valzim Mziu

Ismet Jashanica

Enver Elshani

Rrahman Olluri

Metë Bytyqi

Driton Gashi

Aksioni i policisë në Lipjan

Prokuroria Themelore në Prishtinë ka njoftuar se janë arrestuar nëntë persona, të dyshuar se kanë kryer veprën penale ‘’Keqpërdorimi i pozitës apo autoritetit’’ dhe veprën penale të ‘’Mashtrimit’”.

Prokuroria Themelore në Prishtinë, njofton se personat e arrestuar në cilësinë e personave zyrtar, si anëtarë të Komisionit teknik kanë bërë pranimin e punimeve të stadiumit futbollistik në fshatin Magure Komuna e Lipjanit, kinse janë kryer punimet sipas kontratës së fituar nga një kompani.

Po ashtu, gjatë këtij aksioni është ndaluar edhe një (1) person, përgjegjës i Kompanisë në fjalë. Ndërkaq, personat e lartcekur me këto veprime dyshohet se i kanë shkaktuar dëme buxhetit komunal në vlerë rreth treqind mijë (300.00) euro”, thuhet në komunikatë.