Presidentja e Republikës së Kosovës, Vjosa Osmani, e ka emëruar sot Alban Krasniqin anëtarin e ri të Komisionit Qendror të Zgjedhjeve.
Krasniqi është emëruar pas propozimit të grupit parlamentar të Lëvizjes Vetëvendosje dhe do të shërbejë për kohëzgjatjen e mandatit të mbetur.
“Në ceremoninë e betimit para Presidentes, anëtari i ri i KQZ-së deklaroi se do t’i kryej detyrat e tij në mënyrë të ndershme, besnike, të paanshme, profesionale dhe të ndërgjegjshme”, thuhet në njoftim, shkruan Gazeta Insajderi.
Lexo edhe:
Krasniqi është burri i ministres së Drejtësisë, Albulena Haxhiu, dhe kjo nuk pozita e parë publike e tij.
Gazeta Insajderi në gusht të vitit të kaluar kishte raportuar se si Krasniqi kishte fituar një pozitë në qeverinë e Albin Kurtit.
Ai ishte emëruar Këshilltar i jashtëm politik i Elbert Krasniqit, ministrit të Administrimit të Pushtetit Lokal, pati zbuluar Gazeta Insajderi.
Lajmin e pati konfirmuar vetë ministri Krasniqi, i cili e kishte vënë vulën e këtij vendimi.
“Mund te konfirmoj se është emëruar Këshilltar i jashtëm politik Alban Krasniqi. Ka tri ditë që është emëruar në këtë pozitë”, pati thënë ministri Krasniqi në gusht për Gazetën Insajderi.
Alban Krasniqi pos që është bashkëshorti i shefes së Drejtësisë të vendit, është edhe i afërt me partinë në pushtet Lëvizjen Vetëvendosje.
Nën logon e kësaj të fundit kishte kandiduar për kryetar të komunës së Malishevës në zgjedhjet lokale të vitit 2021, por nuk kishte arritur të fitojë kundrejt Ekrem Kastratit, që tash mban pozitën e të parit të këtij qyteti.