Në kohën kur qytetarët janë ankuar për faturat e shtrenjta të rrymës, ministrja e Ekonomisë, Artane Rizvanolli, ka thënë se Kosova mbetet shteti me çmimin e energjisë elektrike më të lirin në rajon.
Rizcvanolli këtë e ka thënë para foltores së Kuvendit, ku po bëhet shqyrtimi i Propozim-rezolutës në lidhje me çmimin dhe faturimin aktual të energjisë elektrike për konsumatorët.
“Vitet e fundit kanë qenë sfiduese në sektorin e energjisë, kriza u përballua në mënyrën më të mirë të mundshme. Patëm një bashkëpunim të shkëlqyeshëm me Shqipërinë. Kosova mbetet shteti me çmimin e energjisë elektrike më të lirin në rajon”, është shprehur Rizvanolli.
Më tutje, Rizvanolli ka ritheksuar se Qeveria e Kosovës i ka ndihmuar qytetarët dhe bizneset përmes subvencionimit.