Presidentja Vjosa Osmani e ka cilësuar fitore të Kosovës liberalizimin e vizave nga Parlamenti Europian.

Osmani ka thënë se ky vendim është meritë e popullit të Kosovës.

Sipas saj, nga viti tjetër qytetarët do të ndihen të barabartë me popujt evropian.

Postimi i plotë:

Vendimi i sotëm final për liberalizimin e vizave për qytetarët e Kosovës është fitore, jo vetëm për vendin tonë, por për vetë demokracinë dhe unitetin në Evropë. Ky vendim është meritë e popullit të Kosovës, vendosmërisë së pashembullt të treguar përgjatë viteve, pavarësisht vonesave dhe padrejtësive të ndryshme.

Më 1 janar 2024, qytetarët tanë më në fund do të ndihen të barabartë me popujt tjerë evropian, për të lëvizur lirshëm në kontinentin që ata i përkasin, e për të cilin kanë kontribuar ndër shekuj. Tanimë, lëvizja në shtetet evropiane është më e lehtë, familjet tona janë më afër dhe mundësitë për avancim e bashkëpunim më të mëdha. / Insajderi