Drejtimi i qeverisë në mungesë të kryeministrit – a e shpërfilli Avdullah Hoti, Besnik Tahirin?

Mungesa e përkohshme e kryeministrit Avdullah Hoti si pasojë e infektimit me epideminë COVID-19, ka ngjallur debat për pasuesin kalimtar të tij në krye të ekzekutivit

Drejtimi i qeverisë në mungesë të kryeministrit – a e shpërfilli Avdullah Hoti, Besnik Tahirin?

Në karrigen e tretë më të rëndësishme të Qeverisë së Kosovës jo gjithëherë ka zënë vend i njëjti anëtar i kabinetit qeveritar.

Kjo karrige është ndarë ndërmjet Albulena Balaj-Halimajt e Driton Selmanajt, dy zëvendësve të kryeministrit Avdullah Hoti, të cilët e kanë parë atë ulëse si mjet për afirmimin e fuqisë politike të tyre.

Por, gjatë periudhës emergjente shëndetësore, kur mbledhjet e Qeverisë së Kosovës po mbahen nga distanca dhe me mungesën e përkohshme të kryeministrit, zëvendësat e Hotit janë pëfshirë në një tjetër “betejë”. Një ballafaqim ky për ulësen e kryeministrit.

Një debat të tillë e ka hapur të hënën Vesel Krasniqi, ministri i Tregtisë dhe Industrisë, kur deklaroi se bashkëpartiakja e tij, Albulena Balaj-Halimaj e ka marrë në drejtim udhëheqjen e Qeverisë së Kosovës me autorizimin e kryeministrit Hoti, ndonëse sipas Rregullores së Punës së Qeverisë, drejtimi i qeverisë i takon Besnik Tahirit, zv/kryeministrit të parë.

Tahiri, në një deklarim për Gazetën Insajderi të martën, ka thënë se ushtrimi i pozitës së kryeministrit në detyrë nuk është problematikë e qeverisë. Ka pohuar se delegimi i punëve të kryeministrit tek zv/kryeministrat, rregullohet me Ligj.

Zëvendësi i parë i kryeministrit Hoti ka deklaruar se ai momentalisht ndodhet në Sarandë, qytetin jug-perëndimor të Shqipërisë dhe se nga atje nuk mund të ushtrojë pozitën e kryeministrit në detyrë, si pasojë e mungesës së përkohshme të veprimit nga kryeministri Hoti.

“E para, unë fizikisht nuk jam në Kosovë. Kam ardhur në Sarandë për t’i marrë fëmijët që ndodheshin këtu”, ka thënë Tahiri në një bisedë telefonike për gazetën. “Sa i përket kësaj teme, unë nuk mundem ta ushtrojë pozitën e kryeministrit në detyrë sepse nuk jam momentalisht në Kosovë. Kur nuk është kryeministri, punët e qeverisë i delegohen zëvendëskryeministrave të tjerë”.

Sipas Tahirit, funksionimi i punës së ekzekutivit, i cili rregullohet sipas Rregullores së Punës së Qeverisë, nuk parasheh delegimin e punëve nga kryeministri tek zëvendëskryeministri i dytë në radhë duke anashkaluar zëvendësin e parë të kryeministrit.

“E dyta, kjo çështje është rregulluar me fushëveprimin e Qeverisë së Kosovës, që kur një një zëvendëskryeministër nuk ndodhet në Kosovë, punët delegohen tek zëvendëskryeministrat e tjerë
Secili prej zëvendëskryeministrave është në kontakt dhe koordinohet me kryeministrin Hoti, sepse edhe punët dhe koordinimin e kemi bërë online, pjesë e të cilave ka qenë edhe kryeministri Hoti”, ka theksuar Tahiri.

Sipas pikës 2 të Nenit 9 të Rregullores së Punës së Qeverisë, vetëm në rast të mungesës së zv/kryeministrit të parë punët e qeverisë i delegohen zëvendëskryeministrit të dytë apo të tretë.

Pretendimin e Vesel Krasniqit se udhëheqja e qeverisë është marrë përkohësisht në dorë nga zëvendëskryeministrja Balaj-Halimaj, nuk i ka pohuar as Xhavit Beqiri, zëdhënësi i Qeverisë së Kosovës.

Në një deklarim për media të martën, Beqiri ka deklaruar se vendimet e Qeverisë së Kosovës mund t’i nënshkruajnë secili prej zëvendësve të kryeministrit Hoti.

“Ai po vazhdon që ta koordinoj punën e Qeverisë nga shtëpia, por vendimet që merren duhet t’i nënshkruajë dikush dhe në mbledhjen e fundit i ka nënshkruar zëvendëskryeministrja, por që këto vendime mund t’i nënshkruajnë edhe zëvendëskryeministrat e tjerë”, theksoi zëdhënësi i qeverisë.

Kryeministri Avdullah Hoti rezultoi pozitiv me epideminë COVID-19 të dielën dhe që prej asaj dite ka qëndruar në vetë-izolim, sipas rekomandimeve të institucioneve shëndetësore.

Megjithatë, i pari i Qeverisë së Kosovës vazhdon të jetë i përfshirë në fushëveprimin e vet përmes punës nga apartamenti i tij në Prishtinë.

“Ai është në izolim për dy javë dhe gjatë kësaj kohe do të koordinojë punën nga shtëpia”, ka theksuar Beqiri.

Zëdhënësi i qeverisë ka deklaruar se gjendja e kryeministrit Hoti është stabile. /Insajderi.org