Kjo është tema që i bashkoi politikisht Hashim Thaçin dhe Vjosa Osmanin

Kryeministri Avdulla Hoti tha se nesër në Bruksel nuk do të diskutohet tema e Asociacionit të komunave serbe. Kundër diskutimit të kësaj teme kanë dalë edhe Presidenti Hashim Thaçi dhe Kryeparlamentarja Vjosa Osmani.

Kjo është tema që i bashkoi politikisht Hashim Thaçin dhe Vjosa Osmanin

Tema e Asociacionit është hapur edhe një herë në Kosovë.

Gjithçka ndodhi pas raundit të fundit të dialogut mes liderëve të Kosovës dhe Serbisë, përkatësisht kryeministrit Avdullah Hoti dhe presidentit Aleksandar Vuçiq që është mbajtur më 7 shtator 2020.

Pas përfundimit të kësaj faze të dialogut ishte Hoti që gjatë një debati në Komitetin për Punë të Jashtme në Parlamentin Evropian tha se Kosova do ta respektojë marrëveshjen për Asociacionin e komunave me shumicë serbe.

“Në raundin e fundit të diskutimeve me Serbinë në Bruksel janë hapur dy çështje kryesore: çështjen e Asociacionit të komunave me shumicë serbe, dhe pretendimet financiare në mes të të dyja vendeve”.

“Ne kemi nënshkruar marrëveshje në vitin 2015 për këtë Asociacion dhe ne nuk po mundohemi në asnjë mënyrë që t’i ikim asaj marrëveshjeje, ne do ta respektojmë plotësisht atë, por jemi pajtuar që të punojmë së bashku që të arrijmë një marrëveshje ligjërisht obliguese me Serbinë, ku përfshihet edhe Asociacioni dhe çështje tjera”, deklaroi Hoti me 10 shtator, shkruan Gazeta Insajderi.

Se këto tema do të diskutoheshin në takimin e fundit që kishin pala kosovare dhe ajo serbe, kryeministri e kishte thënë edhe më 7 shtator të këtij viti.

“Kemi një marrëveshje të vitit 2015 që është arritur për Asociacionin e komunave me shumicë serbe. Është shtruar kjo marrëveshje në tavolinë për zbatimin e saj dhe ne tash do të diskutojmë si pjesë të marrëveshjes përfundimtare, duke mos e bërë asnjë veprim derisa nuk e përmbyllim marrëveshjen finale”, tha Hoti.

Presidenti dhe Kryeparlamentarja dalin kundër Kryeministrit

Hashim Thaçin dhe Vjosa Osmanin – dy kundërshtarët e mëdhenj politikë – i ka bashkuar së fundimi tema e Asociacionit.

Të dy e kanë kundërshtuar fuqishëm rihapjen e kësaj teme në dialogun ndërmjet dy shteteve fqinje, Kosovës dhe Serbisë.

Kryeparlamentarja ditë më parë tha se brenga kryesore e saj është se çfarë është duke ndodhur në Bruksel.

“Për fat të keq, kryeministri aktual është i vetmi zyrtar publik i Kosovës, që ka pranuar deri më sot që të rihapet tema e Asociacionit të komunave (me shumicë) serbe. E dyta, është i vetmi zyrtar publik deri sot që e kundërshton vendimin e Gjykatës Kushtetuese për Asociacionin, të vitit 2015 dhe ka deklaruar publikisht më 10 shtator në Parlamentin Evropian se do ta zbatojë plotësisht Marrëveshjen për Asociacionin të vitit 2015”, tha Osmani më 11 shtator, shkruan Gazeta Insajderi.

Derisa Presidenti sot tha se Kuvendi i Kosovës duhet urgjentisht ta trajtojë këtë hap të rrezikshëm të Qeverisë së Kosovës në dialogun e Brukselit.

“Askush nuk ka mandat që të bisedojë në emër të Kosovës për tema të mbyllura, në Bruksel apo kudoqoftë. Kosova nuk mund dhe me asnjë çmim asnjëherë nuk do të lejojë që brenda territorit të saj të krijohet një entitet politik, i cili do të ishte riprodhim i Republikës Serbe në territorin e Kosovës”, ka thënë Thaçi, shkruan Gazeta Insajderi.

“Diskutimi për Asociacionin nesër në Bruksel është fillim i instalimit të Republikës Serbe brenda Republikës së Kosovës. Ndërsa, diskutimi për pronat e Kosovës me Serbinë është në kundërshtim me Kushtetutën dhe ligjet e Kosovës, si dhe është cenim i sovranitetit të shtetit tonë”.

Si për t’i shuar zërat kundërshtues, Hoti tha se nesër në raundin e ri të bisedimeve me Serbinë nuk do të diskutohet tema e Asociacionit të komunave serbe.

“Nesër nuk është ditë e rrezikshme për vendin”, tha Hoti, duku iu kundërpërgjigjur kështu deklarimeve të Thaçit.

Historia e Asociacionit

Formimi i Asociacionit të komunave me shumicë serbe është paraparë me marrëveshjen e parë të Brukselit të vitit 2013, të arritur në dialogun Kosovë-Serbi. Më tutje, detajet konkrete janë harmonizuar me parimet/elementet e përgjithshme nga marrëveshja e vitit 2015.

Në tetor të vitit 2015, kjo marrëveshje u dërgua për interpretim në Gjykatën Kushtetuese të Kosovës nga presidentja e atëhershme e Kosovës, Atifete Jahjaga, shkruan Gazeta Insajderi.

Gjykata Kushtetuese, në vendimin e nxjerrë në dhjetor të vitit 2015, tha se Marrëveshja për Asociacionin në 23 pika të saj, nuk është në harmoni me Kushtetutën e Kosovës.

Gjykata kishte konstatuar që Asociacioni i komunave me shumice serbe do të themelohet, siç ishte paraparë me Marrëveshjen e parë të Brukselit (të vitit 2013), të ratifikuar nga Kuvendi i Kosovës dhe të shpallur nga presidentja e Republikës së Kosovës (v.j. Atifete Jahjaga), kurse Marrëveshja mbi parimet (për themelimin e Asociacionit, e arritur më 2015), nuk është tërësisht në përputhje me frymën e Kushtetutës.

Gjykata Kushtetuese kishte konstatuar që akti juridik i Qeverisë së Republikës së Kosovës dhe statuti që implementon parimet, për të qenë në pajtueshmëri me frymën e Kushtetutës, duhet të plotësojë standardet kushtetuese, shkruan Gazeta Insajderi.

Në fakt, është e diskutueshme që Asociacioni nuk bazohet në multietnicitet, por bashkon komuna në të cilat një komunitet etnik është shumica. Janë gjithsej dhjetë komuna me shumicë serbe në Kosovë./GazetaInsajderi/